المساعد الشخصي الرقمي


مشاهدة النسخة كاملة : بعت الونيت وبعت مزيونة الخيل = والسرج الأسود والشكايم وأعنه


خالد الشعلان
06-03-2017, 09:38 AM
بعت الونيت وبعت مزيونة الخيل = والسرج الأسود والشكايم وأعنه
أرخصتهم في لازمي يا رياجيل = ما بي لغير الله من الخلق منه
وأقضي لزوم الي زهمني وأنا أشيل = حملي وبأنقل كايد الحمل عنه
وأنا ظروفي يا جماعه تهاويل = ولاجاني المحتاج والله أحنه
يومٍ نصاني صاحبي واني الحيل = أعياه همٍ في ضميره يكنه
أجاربيت ودين مافيه تأجيل = وأقساط تشهد كمبيالاتهنه
وعيله وحاله ماتبي زود تفصيل = وكلش يبي مصروف حتي الأجنه
اتلى عهده بمجلسه والمعاميل = من قبل عام وحالته مرجهنه
واليوم لا دله ولا يشري الهيل = تبكي محاميسه على بنهنه
من جور حمله ينهزع غارب الفيل = سبعٍ ثلم وقته نيوبه و سنه
لاراتب ولا شون يعدل به الميل = وحتي الزكاوات أخلفوا فرضهنه
والتاجر أصبح يحلب الذر وبخيل = كفه يباسٍ كنها ظهرشنه
وإن جاه معسر ماحظي بالمناويل = ما ينحرج دام المعاذير فنه
علي حلاله كن عينه درابيل = وعذره يقول البذل يا ناس سنه
تهرم نعاجه ما وقعت فالمحابيل = تامن سكاكينه وتامن مسنه
يالله عسى ماله بطيرٍ أبابيل = بحجارةٍ من نارها ترجمنه
تبحص حلاله بحصة القاع بالسيل = حتى يشوف الفقرهو ويش كنه ؟
ويعيش بين الناس درويش وخبيل = وحتى كلابه تنبحه وأنكرنه
ويذوق طعم الذل ويجرب الويل = حتي ليا جاه المسيكين حنه
الزبده إني بعت مزيونة الخيل = والسرج الأسود والشكايم وأعنه



منقول